Les Ouvrages Du CRASC

Centre de Recherche en Anthropologie Sociale et Culturelle

Index des ouvrages

قصيدة للسيد الحاج خالد على حرف الطا قالها اشتياقا لرئية مكة المكرمة:

هَدَّة

تْخَـوَّضْ بَـحْرِي مَـاء وُ رِيـحْ وَ تْخَلّطُوا

*

وَ ارْيَاحْ الشُّـوقْ بْـشَـدّْ عَاصَـفْ تْـسُوطْ

الاَمْطَـارْ تْعَجَّـجْ وَ الاْمْـوَاجْ يَـزَّرْوْطُـوا

*

مَـاءهُمْ يَـلْـعَـبْ عْـلَى اشْفَـارْ الْحْـيُوطْ

خُـفْتْ اخْنَـاڤِي مَنْـهُمْ جْمِـيعْ لاَ يَقَّنْـطُوا

*

لاَقِـي يَـا رَبِّـي فِـي نْـهَـارْ مَبْـسُـوطْ

فْرَاشْ

صَـابَـرْ ذَا لِي عَيْطَة * وُ طاَلْ ضُرِّي بْطَى

*

غْشِـيتْ مْـنَ الْقَنْطَة * الْعَيْشْ عَنِّي سْمَـاطْ

لِيَّـعْتِي حُـبّْ سْطَى * بْضَـرْبْتُه مَا خْـطَى

*

وَ لْغَطْ عَنِّي لَغْطَـة * رِيـحْ الاَهْوَالْ سَـاطْ

مَـا عَاطِيـني فَـرْطَة * خْيُـولَهْ مْرَبّْـطَـة

*

ءَاشْ يْـتَمّْ الْخُـلْطَة * الْهَـمّْ سَـدَّ وُ حَـاطْ

تَمّْ جْفَاهَا بِهَا يْجُولْ وَ يْحُوطْ

هَدَّة

وَ ايْـدِيـنْ الْعَاشَـقْ فِي هْـوَاهْ يَشَّـابْـطُوا

*

كَـالِّي فِي بَحْـرْ وُ بَـعّْـدُوهْ الاَشْطُـوطْ

لِيعَـاتْ الْحُـبّْ عْلَى جْـوَارْحِـي سَلّـطُوا

*

لاَقِـي يَا رَبِّـي فِـي نْـهَـارْ مَبـْسُـوطْ

فْرَاشْ

أَنَا حُـبِّي تَسْـلِيطْ * حَـازْنِي كِي الصَّـيْطْ

*

وَ ضْغَطْنِي شَدّْ ضْغِيطْ * خَبَّـلْ اوْسَـاطِي

مَانِي مَسْـرُوطْ سْرِيطْ * وَ الْعْظَمْ صَارْ خَيْطْ

*

بَاقِي مَعْـلُولْ سْـقِيطْ * لِيـعْـتِي بَـاطِي

مَرْبُـوطْ بْغِِيرْ رْبِـيطْ * سَاهَـرْ ڤْبَـالْ حَيْطْ

*

طُفْـتْ بْكُلْ حْوَاوِيـطْ * وَ الدّْوَاء خَـاطِي

رَاسِي بَالْعَشْقْ بْلاَ مْدَامْ مَخْبُوطْ

هَدَّة

تْـرَوَّعْ ڤَـلْـبِي وَ الْجْـوَارَحْ تْضَيْـمْـطُوا

*

عَـوْضْ الِّي رَانِـي فَى الْحْـدِيدْ مَرْبُـوطْ

هَـلْ نَـزْهَـى بْوَصْـلِي مْعَ الِّي نَـغَّبْـطُوا

*

لاَقِـي يَا رَبِّـي فِي نْـهَـارْ مَـبْـسُوطْ

فْرَاشْ

نَـبْرَا بَعْـدْ التَّنْـقَاطْ * نَجَّـلْسُوا فِي بْسَـاطْ

*

يَكْـمَلْ غَرْضْ النَّشَاطْ * فَى الْهْنَـا بَـاسَـطْ

مَا فَـادْ لْهُـمْ ضْيَـاطْ * مَقْتَـسَّمْ فِي خْـلاَطْ

*

بِعْ الْقَـرْ بْـقِـرَاطْ * يَـا الِّـي غَـابَـطْ

تَنْجَى مْنَ الْفَكْرْ وُ لاَ تْعُودْ مَنْشُوطْ

هَدَّة

كْـيَاتَـرْ وَ سْـنَاتَـرْ فِـيهُـمْ يْـنَـقْـطُوا

*

وَ نْـدِيـمْ الْخَـمْـرْ عْـلَى الْوَانْ مَحْطُوطْ

وَ حْـرَايَـمْ بِينْ اهْـلْ الْغْـرَامْ يَتْغَرْنْـطُوا

*

لاَقِـي يَـا رَبِّـي فِي نْـهَـارْ مَبْـسُوطْ

فْرَاشْ

وَ وْتَـارْ تْنَـقَّـطْ * فِي اشْغَـالْ غَـرْنَـاوَطْ

*

وَ الْعُـودْ يْـلاَوَطْ * فِي اصْـوَاتْ لَغْـطُه

وَ زْرَابِـي خَـطْ بْخَـطْ * نُـوعْ وَ بْرَانَـطْ

*

وَ مْـدَامْ مْزَرْقَـطْ * مَا يْـكُـونْ حَـطُّـه

وَ الدَّوْحَة تَعْبَقْ فِي نْسِيمْ مَغْبُوطْ

هَدَّة

وَ انْـوَارْ الـزَّهْرْ عْـلَى نْـهَـارْ يَسَّاقْطُوا

*

وَ اطْـيَـارْ تْـغَرَّدْ فِي عْمَـايَمْ الشَّـوْطْ

وَ سْـوَاقِي مَنْ عَـذْبْ الْمْـيَاهْ يَصَّارْطُوا

*

لاَقِـي يَا رَبِّـي فِي نْـهَـارْ مَبْـسُـوطْ

فْرَاشْ

...................... * بْعِيدْ مَنْ فَرّْطُوا

*

فِيَ وَ الْحَمْدْ شَرْطُوا * الْعَشْقْ يَا مْرَة اعْطَى

.................... * بْزَادْهُمْ صَـوْرْطُـوا

*

وَ الْمَشْـرُوطْ بْلَغْطُه * مْعَ عْيُـوسْ الْخْـطَا

.............. تْـغَطُّوا * بَالسّْرَابْ وَ تْمَغْطُوا

*

غَـلْـبُوا مَـنْ يَصَّـطُّوا * تْلُولْهَا وَ الْوْطَا

دُونْ وْطَنْهَا حَالُوا جْبَالْ وَ حْيُوطْ

هَدَّة

كِي نَـعْـمَلْ بْوَصْـلِي شْـوَاقْـهَا عَـيّْطُوا

*

مَـنْ ضَـيّْ الْـمَطْـرُودَة بْقِـيتْ مَقْـنُوطْ

عْـرَبْ وَ عْـجَـمْ بِـهَا طْبُـولْهُمْ غَيّْـطُوا

*

لاَقِـي يَا رَبِّـي فِـي نْـهَـارْ مَبْـسُـوطْ

فْرَاشْ

سُلْطَانَةْ عْـرَبْ الرَّبْطْ * وَ الْعْجَـمْ وَ الْقْـبَطْ

*

زِينْ الاَّ مَثْـلُـه رَهْطْ * فِي جْمِيعْ الرّْهُوطْ

 

رَعْـرُوعْ انْ يَتْرَهْـوَطْ * فِي كْمَـالُه نْشَطْ

*

ذَاكْ الثِّيـثْ تْمَغَّـطْ * بِينْ الاَقْـمَاشْ شَـاطْ

اسْـوَدْ مَـدْعُوبْ اسْـبَطْ * لَلْعْـذِيـبَة بَـطْ

*

مَنْ رَمْدِي جَابْ الْغَطْ * شَاشْ فَُوقْ الرّْيَـاطْ

بَرْناَطِي يْبَانْ عْلَى سْرِيرْ مَڤْشُوطْ

هَدَّة

مَـا تَظَّـفْـرُه بَـمْـسُوكْ وُ لاَ تَـمْـشْـطُه

*

وَ حْـوَاجَـبْ فِي قُرْطَـاسْ نُونْ مَنْـقُوطْ

ذُوكْ الْعَيْـنِينْ مْـدَافَـعْ الْعْـدُو صَـرّْطُـوا

*

لاَقِـي يَا رَبِّـي فِي نْـهَـارْ مَبْـسُـوطْ

فْرَاشْ

عَـارَمْ زِيـنْ الْحَنْطَة * مْرَهْـوْجَة فَى الْخْطَا

*

صَـارِي فِِي غَرْيَاطَة * عْلَى مْيَاهْ الشْطُوطْ

كِي بَـدْرْ انْ يَتْـغَـطَّى * وُ لاَحْ دَاجْ الْغُطَا

*

فَتْـنَتْ ڤَلْـبِي وَ اعْطَى * الْمَايْنَة لَلشَّـرُوطْ

وَانَا عَشْقِي مْنَ السَّابْقِينْ مَنْشُوطْ

هَدَّة

مَن نَـارْ الْحُـبّْ الْـوَانْـهُـمْ يَـتْشَـوّْطُوا

*

وَ يْغِـيبُوا مَـا يَـدْرُوا طْـلُوعْ وَ هْـبُوطْ

مَنْ شَـدّْ الْهْـوَى فَى الاْهْـوَالْ يَتْڤَـاشْـطُوا

*

لاَقِـي يَا رَبِّـي فِي نْـهَـارْ مَبْـسُـوطْ

فْرَاشْ

سُـبْحَانْ الْبَاسَـطْ * فِي جْمَالْـهَا وَاشْ حَـطْ

*

لَحْـظْ مْجَلَّطْ * سِيفُـه كِي الصَّـابِي قْنُوطْ

وَ الْخَـدّْ مْنَـقَّطْ * عَنْبْرِي بْحَـالُه رْصَـطْ

*

وَ الْجِيـدْ مْرَبَّـطْ * مَنْ عْقُودَهْ وَ الْخْـيُوطْ

مَڤْـوَانِي نَغْـبَطْ * فِي شْبَـاحْ بَلْـدْ الْوَصَـطْ

*

عَسْـجَدْ وَ شْكَرْنَطْ * وَ الدّْبَاجْ هُمَا الْحْـنُوطْ

لُو ذَاقْ بْحَالِي حَدْ صَارْ مَضْغُوطْ

هَدَّة

حَـتَّـى يَـنْجَدْبُـوا مْنَ الْعْـقُولْ وَ يْفِلْـطُوا

*

وَ يْصِـيرُوا كِـمَـنْ هُوَ صْڤِـيعْ مَنْـشُوطْ

مَـرَّاتْ بْـلاَ قُضْـبَانْ ضَـرْبْ يَسَّـوْطُوا

*

لاَقِـي يَا رَبِّـي فِي نْـهَـارْ مَـبْسُـوطْ

فْرَاشْ

نَصْرَخْ فِي عْيَاطِي * وَ انْدْبَـلْتْ بَـرْبَـاطِي

*

هَلْ نَـزْهَى بَبْصَـاطِي * مْعَ شْبَاحْ الْبْسِيطْ

صَـفْـوَةْ الْعَـاطِي * وَ الثَّـيُـوثْ بَرْنَاطِي

*

وَ جْبِـينْ مْسَـطِّي * مَنْ يْـرَاهْ ذَاقْ الْفْرِيطْ

الِّي بِـهَـا حَـاطِـي * مْـطَـلَّعْ نْشَـاطِ

*

اصْـلَحْ مَا نَخْطِي * ءَا الْعَارفْ مْنَ الْغْـلِيطْ

صَافِي بَالْعَشْقْ مْنَ الشَّعَالْ مَفْرُوطْ

هَدَّة

وْ جْـنُودْ الْعَـشْـقْ عْـلَى الْعْشِيقْ يَشَّارْطُوا

*

مَا يَـتْهَـنَّى غِيرْ إِذَا قْـضَى الْمَـشْـرُوطْ

وَ الِّي كِـي خَـالَدْ فِي زْمَـانَـهْ مْـفَرّْطُـه

*

لاَقِي يَـا رَبِّـي فِي نْـهَـارْ مَـبْـسُوطْ

تَمَّتْ