Les Ouvrages Du CRASC

Centre de Recherche en Anthropologie Sociale et Culturelle

Index des ouvrages

قصيدة للسيد بن حراث من ناحية سيدي بالعباس في شان الحرب الكبري التي لم يرها تاريخ قط الواقعة سنة 1914 مسيحية مات رحمه الله هذه نحو الخمس سنين شكر فيها المريشال جوفر والجيوش الفرنساوية و المسلمين الذين كانوا لهم اعانة:

كِي نَـعْمَـلْ فَى النَّقْـرْ الِّي طْـلَعْ وَ تْخَصَّرْ 

*

وَ تْـخَوَّضْ بَحْـرِي بِـيَ غْـرَقْ بَـابُورْ

شَافَـتْ عَـيْـنِي خَـوْدَة شَـايْفَـة مَـسَّعَّـرْ

*

تَـبْكِي وَ تْـنُوحْ فَى الْبَـابْ عَـنْدْ الصُّـورْ

ڤُـلْتَـلْهَا نَـبِيـنِي يَـا ارْمَـاڤْ الْقَـصْـوَرْ

*

عِـيدِي بَـحْدِيـثْ الصَّـحْ وَ الْمَـشْـهُـورْ

ڤَـالَـتْ لِي حَـالِي مَهْـمُـومْ رَاهْ مْـدَمَّـرْ

*

إِذَا نَـحْـكِي لَـكْ يْـضِيـقْ بِـكْ الْـمُـورْ

نَـبْكِي مَنْ حَـالِي وَلْـدِي مْـشَى لَلْعَصْـكَرْ

*

بَالْقَـانُـونْ الِّـي رَسْــلُـه الْـڤُـفِرْنُـورْ

مَا يَـقْـدَرْ يَخْـلِي وَ لاَ يْـطِيـڤْ يْـعَـمَّـرْ

*

مَـا شَـافْ طْـرَادَاتْ وَ لاَ دْخَــلْ شْـرُورْ

وَلْـدِي غُفْـلِي فِي النَّطْـحَاتْ مَـا يَـتْوَخَّـرْ

*

قَـادَرْ يَـرْجَـعْ إِذَا شَــافْ لَلْـجَـمْـهُورْ

مَا عَـنْـدُه صَاحَـبْ وَ لاَ حْـبِيـبْ يْـدَبَّـرْ

*

غِـيـرْ الْـحَـيّْ الْـوَاحَــدْ الْـغَـفُــورْ

وَلْـدِي هَوَّلْـنِي وَ فْـنِيـتْ وَاشْ يْـصَـبَّـرْ

*

مَنْ لِي رَوَّحْ وَانَـا خَـاطْـرِي مَـضْـرُورْ

وَلْـدِي هَـرَّسْ لِي عَـظْـمِي وُ لاَ يَـتْجَـبَّرْ

*

حُـبُّه رَشَّـى لِي عَـظْـمِي بْـلاَ سَـاطُورْ

يَـتْخَبَّلْ لِي غَـزْلِي سَـاعَـةْ انْ نَـتْـفَـكَّرْ

*

وَحْـشَهْ عْـلِيَّ فِـي كُـلْ يُـومْ يْــثُــورْ

يُـومْ الصَّـدَّة فِي وَجْـهِي اشَّـتَّتْ مَـجْـمَرْ

*

حَـارَمْ نُـومِي مَـنُّه خَـاطْـرِي مَـنْـقُورْ

وَلْدِي مَنْ صُـغْـرُه وَانَـا مْـعَـاهْ مْـوَقَّـرْ

*

عُـمْرَهْ مَا خَـلَّى لِي خَـاطْـرِي مَـنْـقُورْ

ڤُـلْـتْ لْهَا يَـزِّنِي مَـنْ الْكْـلاَمْ نْقَـصَّـرْ

*

وِاذَا تَـبْـكِي بَـكْيَـكْ رَاهْ غِـيـرْ غْـرُورْ

ڤَالَـتْ لِي لُـو مَـاتْ هْـنَايَ الْمُـوتْ مْقَـدَّرْ

*

نَـعْرَفْ قَبْـرُه وِيـنْ يْـكُونْ بِـينْ قْـبُـورْ

 

 

وِاذَا مَـاتْ بْـعِيـدْ لْـهِيهْ مَا جَـبْتْ خْـبَـرْ

*

يَـبْقَـى يَـتْلاَوَحْ لَلْـوَحْـشْ وَ الـطُّـيُـورْ

ڤَـالَتْ سَامَحْـنِي يَا شِـيخْ نَـبْـغِي نَـهْـدَرْ

*

الْمَذْعُـورَة تَـجْفَـلْ مْنَ الْحْبَـلْ مَـذْعُـورْ

ڤَـالُوا لِي مْنَ الْمُـوتَـى بَـانْيِيـنْ ڤْـنَاطَـرْ

*

بِـهُـمْ يَـڤَّطْـعُـوا وِيــدَانْ كِالْـبْـحُـورْ

وِاذَا رَبِّـي رَادْ عْـلِيـهْ وَ الْأَجَـلْ قْـصَـرْ

*

هُـوَ الْغَـادَرْنِـي وَانَــا الِّـي مَـغْـدُورْ

مَـا يَـدَّفْـنُوا كِـيفْ النَّـاسْ عَـنْدْ مْـقَابَـرْ

*

فِي عَـشْرِيـنْ ءَالاَفْ نْصِـيبْ زُوجْ قْـبُورْ

كُـلْ لِيـلَة وَ نْـهَـارْ كْـحِيـلْ غِيرْ يْـنَبَّـرْ

*

نَوْ رْعُـودْ قْـوِيَـة فِـي زْمَـانْ زْرُورْ

طْـبَلْـهُمْ عْـلَـى الْـقِـتَـالْ غِـيرْ يْـنَڤَّـرْ

*

بَـاغْوَايَـطْ وَ الْمُـوزِيـڤََـاتْ وَ الطَّـنْـبُورْ

وَلَْـدَكْ رَوَّحْ فِي غَـاشِي قْـوِي وَ مْـسَـطَّرْ

*

غِـيـرْ النَّـاسْ الِّي يَـلْقَـاوْا صَهْدْ الْكُـورْ

عَـرْبِي وَ مْـدِينِي وَ الْقُرْغْـلِي وَ حْـضَـرْ

*

وَ النَّـاسْ الِّي مَـا نَـقْـرُوا لْـهُـمْ زَبُـورْ

مَـنْ كُلْ وْطَـنْ جَاتْ النَّـاسْ فِي ذَا الْمَيْـمَرْ

*

عْـرَبْ رَحَّـالَة وَ اهْـلْ مْـدَنْ وَ دْشُـورْ

هَـدْرُوا بِهُــمْ الْحُـكَّـامْ فِي الْمُـبَـشَّـرْ

*

ڤَـالُوا عْـرَبْ قُـرَيْشْ عْـلاَمْـهُمْ مَشْـكُورْ

رَكّـبُوا رَايَـاتْ الْقِـتَـالْ بَاعْـلاَمْ احْـمَـرْ

*

وَ الِّي نَطْـحُـوا رَاهُـمْ مَالْـيِـينْ صْـدُورْ

وَلاَّتْ الظَّـلْـمَة وَ الْغَـيْـمْ مَـا يَـتْفَـڤْـهَرْ

*

مَـنْ جَـهْـدْ الْبَـارُودْ تْـڤُـولْ نَـوْ زْرُورْ

لاَ فَـكَّـاكْ وُ لاَ حَـزَّاجْ وَ لاَ مَـنْ يَـنْعَـرْ

*

الْغَـالَبْ فَـارَحْ وَ الِّـي خْـسَـرْ مَـقْهُـورْ

الـدَّمْ يْـفَيَّـعْ مَـا صَـابْ وِيـنْ يْـحَجَّـرْ

*

حَتََّى وَلَّـى يَجْـرِي تَحْـتْ الاَرْضْ يْـغُـورْ

مَنْ مُـوتَتْ هَـذُوكْ وُ ذُوكْ مَا كَـانْ عْـبَـرْ

*

قَـشْ حْـوَانِيتْ تْـفِـيَّا صْـبَـحْ مَـنْشُـورْ

ڤُـلْـتْ لْـهَا مَـنْ حَـقَّـكْ يَالرِّيـمْ الثَّـامَرْ

*

بَـكْـيَـكْ يْـوَالَـمْ مَـا فِـيـهْ تَـفَـخُّـورْ

 

 

وَلْـدَكْ نُـقْطَة مَنْ مْـدَادْ فِي وَسْـطْ بْـحَـرْ

*

وِيـنْ يْـحَـوَّسْ الِّي يْـصِيـبْـهَا مَـجْبُورْ

وِيـنْ تْـشُوفْ الْكَحْـلاَء يَا الِّي مَتْـبَـصَّـرْ

*

وِاذَا تَـمْـشِي فِي الظَّـلْمَة انْـتَ مَـغْـرُورْ

حْـدِيـثْ بْـلاَ ڤَمْـنَة مَا يْـجِي فَى الْخَـاطَرْ

*

كِالْـعَيْـشْ الطَّـايَـبْ مَا كَـانْ فِيهْ بْـزُورْ

وَ لُـو شَـتِّي شُـبَّانْ مْـشَاوْا مَا بَـانْ خْـبَرْ

*

ذِي عَـامِيـنْ اوْفَـاوْ وُ نَـحْوْ سَـتْ شْـهُرْ

مَنْ مَلْـيُونْ وُ نَصْـفْ مْـشَاوْ مَا بَـانْ خْـبَرْ

*

الـنَّـطْحْ الِّي نَـطْـحُـوا بِـهْ تَــرَيُـورْ

هَـذَا أَلْمَـانْ الْـفَـاعْ وُ سَـمّْـهُمْ يَـتْڤَطَّـرْ

*

مَا يَـحْكَـمْهُمْ عِـيسَاوِي سْـطَـى شَـحُورْ

يَـهَّـدْرُوا هَـدْرَةْ عَـڤُّونْ بَـلْسَـانْ اكْـوَرْ

*

مَا يَـفَّهْـمُـوا بُـونْ نْـوِي وَ لاَ بُـوجُـورْ

شِـينِينْ الْهَـمَّة وَ الـذَّاتْ وَ اللُّـونْ اصْـفَرْ

*

وَ الِّي يْـصَـادَفْـهُمْ هُـوَ الِّـي مَـغْـرُورْ

كُـلْ طْرَنْـشِي يَـبْنُـوا فِـيهْ بَنْيْ شْـوَامَـرْ

*

بَالْحَـجْرَة الصَّـمَّة سِـيمَـانْ وَ الْيَـاجُـورْ

فِي غَـفْلَة ذَا الشِّـي مَا جَـابْ لَهْ حَـدْ خْـبَرْ

*

وَ ثْرَنْـتَهْ سُـلْطَـانْ فْـرَانْـصَة مَـغْـدُورْ

حِـيـنْ اطَّـلَـعْ بَالْأُمُـورْ صَـدّْ مْـشَبَّـرْ

*

فِي زَيْـشَهْ كَـامَـلْ مَا كَانْـشِي الْمَـحْـڤُورْ

طَـاحْ عْـلِيهُمْ شَـاوْ صْبَـحْ وَقْتْ الْـفَجْـرْ

*

صَيْـدْ مْعَـيْهَرْ فىَ النَّطْـحَة بْـطَلْ مَـذْكُورْ

ڤَـالَتْ نَـصْبَـرْ عْـلِيَّ هَـكْذَا رَبِّـي قَـدَّرْ

*

وِاذَا عُـمْـرَهْ طْـوِيـلَـة الـسَّـاعْ يْـدُورْ

ڤَـلْبِي شَـابِي شُـورْ هْـوَاهْ نَبْـغِي نَخْـطَرْ

*

جَـانِي دَارَڤْ كُـودَة شَـڤْ سَـبْعْ بْـحُـورْ

جَـوَبْـتْ الْهَـيْفَـة جْـوَابْ مْنَ الِّي يَحْـصَرْ

*

كَـالِّي كُـنْتْ وْكِـيـلْ عْـلِيـهْ فَى الْأُمُـورْ

ڤَـالَتْ لِـي حَـتَّى انَـايَ بْـعَـرْفِي نَهْـدَرْ

*

لاَ تَحْكَـمْشِي عْـلِيَّ حُـكْمْ ظُـلْـمْ وُ جُـورْ

وَلْـدِي يُـوفِي الْعَـهْدْ جْمِـيعْ بَـالِّي يَثْـمَرْ

*

وِاذَا يَـثْـمَرْ مَـاشِي كِـي الـنَّـاسْ يْـدُورْ

 

 

وَلْـدِي يَـعْرَفْ حَـقْ الـنَّـاسْ بِـهْ يْقَـدَّرْ

*

مَا يَبْغِـيشِي الْمَـرْوْ الِّـي عْـلِيـهْ يْـجُـورْ

ڤُـلْتْ لْـهَا ذَا الْوَقْـتْ الشِّـينْ مَا كَانْ وْقَـرْ

*

هَذَا الْوَقْـتْ قْـبِـيحْ مْـعَ أَهْـلُـه ڤَـشُـورْ

كَـانْ الْغَـاشِـي فِـي ذَا لاَفْـرِيـكْ مْعَـمَّرْ

*

كُلْ ڤْـبِـيلْ بْـنَاسُـه يَـا مْـرَة مَـسْـتُورْ

وَلْـدَكْ مَـاشِي غِيرْ انْـتِ مْـشَى لَلْعَصْـكَرْ

*

وَلْـدَكْ وِيـنْ يْـجِي لَلنَّـاسْ فَـى الْعُـشُورْ

وِاذَا عُـمْـرَهْ طْـوِيلَـة يْـغِيبْ وُ يَـظْهَـرْ

*

يُـومْ سْـعِيـدِي يْـجِيـكْ فِــي بَــابُورْ

هُـوَ وَ حْـنَايَا كَامَـلْ غِيرْ سَهْـمْ الْمَحْـشَرْ

*

وَ لاَ بُـدَّة مْنَ الْمُـوتْ تْـكُونْ يَا مَغْـرُورْ

حَـرَّاثْ احْـمَدْ يَبْـغِي فَـى الْكْـلاَمْ يْعَـبَّرْ

*

لَلنَّـاسْ الِّـي مَعْـشُوقِـينْ فِـيـهْ عْـطُورْ

وَ نْـخَـلِّي ڤَـوْلِـي بَـهْـوَى مْـلِيحْ يْفَـكَّرْ

*

عَـنْـدْ مْـدَنْ وَ الرَّحَّـالَة وَ اهْـلْ دْشُـورْ

ڤُـلْـتْ لْـهَا اسْـمَكْ وَرِّيـهْ بَـاهْ نْڤَـصَّرْ

*

يَـا تَـاجْ الْخَـوْدَاتْ السَّـاكْـنَـاتْ الْڤُـورْ

ڤَـالَتْ يْـسَمُّونِي خَـيْرَة وُ بُـويَ الاَخْـضَرْ

*

زَوْجِـي مَـاتْ تْـوَفَّى فَى الْعْـرَبْ مَغْـدُورْ

وَلْـدِي سَـمِّيـتُه عْـلِيـهْ زَهْـوْ الْخَـاطَـرْ

*

مَـا خَـلِّيتْ احْـوَاشْ عْـلِيهْ لَـبْـدْ نْـزُورْ

صَـبْـرَكْ لَلَّهْ وَ الْمُـولَـى عْـلِيكْ يْـدَبَّـرْ

*

قَـادَرْ يَرْجَـعْ هَـذَا الْقَـبْضْ فَـرْحْ سْـرُورْ

الْعَـالَـمْ رَبِّـي بَالْغَـيْبْ سَـامَـعْ بَـاصَـرْ

*

حَـاظَـرْ نَـاظْـرْ بَالْقْـلُوبْ فَى الصُّـدُورْ

مَـا نَـدْخُلْ غْمُـوقْ نْخَـافْ لاَ نَسْـتَوْعَـرْ

*

وَ الِّـي يَـدَّعِـي لاَ بُـدَّة يْـبُـورْ يْـبُـورْ

عَـيْبْ عْـلَى مَـرْوْ الِّي مَنْ لْسَـانُه يَعْـثَرْ

*

عَـوْدَهْ سَـابَـڤْ فَى الْعَلْـفَة بْغِـيرْ شْـبُورْ

قَـوْلْ الشُّعَـراء وَ كْـلاَمْ سِيـدِي الاَخْـضَرْ

*

فَى اللُّـوحْ الْمَحْفُوظْ قْـرَاوْ فِـيهْ سْـطُـورْ

مَـا زَالَـتْ هَـذَا الْـكُـورَة الاَّ تَـتْـكَـوَّرْ

*

غِـيرْ صَبْـحَتْ فِي وَسْطْ الْعْـرَبْ مَنْـشُورْ

 

 

الْوَقْـتْ دْعَـى بَالـصّْـنَـايَـعْ الْـمُـدَبَّـرْ

*

ذَا الْكَـلْمَة خَـلاَّهَـا سِـيـدْنَـا مَـذْكُـورْ

عُـمْرِي مَا شَفْـتْ الْإِنْـسَانْ طِـيرْ وُ طَايَـرْ

*

وَ بْـلاَ جَـنْحَـة يَـتْـلاَدَى مْـعَ الطُّـيُـورْ

مَـا يَتْـيَامَـنْ فَى الـرُّبْـلاَنْ مَا يَتْـيَاسَـرْ

*

وَ يْحَـوَّسْ بِـهَـا فَى الْـبَـرّْ وَ الْبُـحُـورْ

فَى الطُّولْ وُ فَى الْعُرْضْ حْسَابْ زُوجْ مْطَايَرْ

*

مَـا تَـغْـلَبْهَـا ڤُـومِـيَة وُ لاَ سَـرْسُـورْ

مُـولاَهَـا قَـبْـلْ الصَّـدَّة يْـكُـونْ مْـزَيَّرْ

*

بَـرْنِي فَى الطَّـيْـرَة مَنْ جَـنْحْـتَهْ مَكْسُورْ

يَـصْعَـدْ بِـهَـا لَلْهْـوَاء يْغِـيبْ وُ يَظْـهَرْ

*

مَنْ عَـنْـدَهْ يَطْـلَڤْ دُخَّـانْ فِيـهْ بْـخُـورْ

فِـيهْ الرِّيـحَـة الشِّـينَـة كَالْڤَـازْ يْصَـكَّـرْ

*

مَا يَـڤْـلَعْـهَا لاَ جَـاوِي وَ لاَ كَـافُـورْ

مُـولاَهَـا عَـنْدَهْ دُويَـة وُ رَهْـجْ مْـڤَطَّـرْ

*

يُـكْـتَلْ بِـهْ امْحَـالْ تْـسَـدّْ عَـيْنْ النُّـورْ

وِيـنْ مَـا شَـافْ الْإِنْـسَانْ لِـيـهْ يْـشَـبَّرْ

*

عَـنْـدَهْ عَــلاَمَـة مَـعْـلُومْ فَـلْـكُـدُورْ

ذِيـكْ الْإِيـشَـارَة بِـهَا مْـنِـيـنْ يْـبَـشَّرْ

*

يَـنْعَـتْ لَلْغَـاشِي نْـعِيتْ ضَـرْبْ الْكُـورْ

خَـبَّـرْنِي رَجَـلْ صْـحِيـحْ لِهُمْ حَـاضَـرْ

*

وَ هْـدَرْ لِي كَـامَـلْ جْـمِـيـعْ ذَا الْأُمُـورْ

بْـلِيسِي فِـي ذَاتُـه بَالرّْصَـاصْ مْـخَصَّـرْ

*

يُـومْ تْـلاَڤُوا فِي فَـرْدَانْ عَـنْـدْ الصُّـورْ

يُـمِينْ وُ لِيـلَة مَا كَـانْ مَنْ جَـابْ خْـبَـرْ

*

حَـتَّـى وَاحَـدْ مَـنْهُمْ مَـا فْـرَحْ بَفْـطُورْ

رْمَـاوْ عْلَى الصُّورْ مْدَافَـعْ مَنْ نْحَاسْ اصْفَرْ

*

يَـضَّرْبُـوا لَلْبُـعْدْ رْصَـاصْـهُمْ مَـشْكُـورْ

اتَّـفْـقُوا وَ تْـلاَقُـوا فِي بْـلاَدْ صْـنُوبَـرْ

*

بَالْـكُـورَة وَ الْمَـدْفَـعْ مَا هْـدَاوْ سْـجُـورْ

وِيـنْ الْغَـرْسْ الِّي مَـحْـدُودْ كَانْ مْـحَـرَّرْ

*

مَـا بَـاقِي حُـرْمَة عْـلَى غَـابَةْ سْبَكْـتُورْ

رَابُـوا الاَجْـبَالْ وُ طَاحُوا هْـدَمْ كُـلْ وْعَـرْ

*

هْـدَاهَـا وَطْـيَة وَ طْـرِيـڤْهَـا مَـنْجُـورْ

 

 

حَـتَّـى وَاحَـدْ مَنْـهُمْ مَـا بْـغَى يَتْـوَخَّرْ

*

مَا يَـتْـوَخَّـرْ غِـيـرْ الِّي عْـلِيـهْ الـزُّورْ

وَ الِّي ظَـالَـمْ لَـبْدَة عْـلَى الْفْـضُولْ يْدَوَّرْ

*

ذَا ڤَـيُّـومْ اعْـطَـاوْ النَّـاسْ لـِيهْ الطُّـورْ

نَـاضْ لْـهُـمْ سُلْـطَانْ فْـرَانْصَة بَالْعَصْـكَرْ

*

فِي زَيْـشَـهْ كَـامَلْ مَا كَانْـشِي الْمَـحْـڤُورْ

طَـاحْ عْلِـيهُمْ كَالْأَسَـدْ فِي وَسْـطْ بْـڤَـرْ

*

ذِيـكْ الدَّوْلَـة مَـنْهَا مَـا رْجَـعْـشِي ثُـورْ

وَ بْـقَـى فِي لَلْمَـانْ بْـلاَ بَـطْوَارْ يْجَـزَّرْ

*

بَالْمُكَـحْـلَة وَ الـسَّـكِّـيـنْ وَ الشَّـاقُـورْ

ذَاكْ مْشَـڤْـلَبْ هْـنَـايَ وُ ذَاكْ مْـڤَـحْـطَرْ

*

ذَا مَـيَّـتْ وُ ذَاكْ مْـقَـابْـلُـه مَـفْـڤُـورْ

سْـعَى كَـذَا مَـنْ جَـنِـرَالْ رَاحْ مْـيَسَّـرْ

*

وَ سْـعَى كَـذَا مَـنْ قَـبْطَـانْ وَ الْمَاجُـورْ

كَـذَا مَنْ أَلْـمَانِي ڤْـرَاطِي وُ صَـدّْ مْكَـسَّرْ

*

رَاحُـوا فِـي غَـلْبَـة وَ لْـقَاهُـمْ الْمَالُـورْ

لُو يَـتْلاَقُـوا فَـى الْوَطْـيَة الْغَـالَبْ يَظْـهَرْ

*

مَا يَـقَّـدْرُوشِـي لَـفْرَانْصَـة فَـى الْبُـورْ

لُو انْ تْجِـيهُمْ لَلْحَـرْبَة وُ ضَـرْبْ الْخَنْـجَرْ

*

يـَفْـنُـوا هَـذَاكْ أَلْـمَـانْ فِـي كَـارْدُورْ

أَلْـمَانْ جْـعَـلْ سُومَـرَانْ فِي وَسْـطْ بْـحَرْ

*

يَـتْمَـشَّى دِيـمَة عَـسَّـة عْـلَى الْبَـابُـورْ

دَارُوا كِـيفُـه نَـاسْ فْرَنْـصَة وَ الاَّ اكْـثَـرْ

*

سُـومَـرَانْ مْـوَتَّـقْ كُـلْ شِـي لُـه فُـورْ

يْـبَـانْ وُ يَـنْـبَى حَـتَّى يْغِـيبْ وُ يَظْـهَرْ

*

مَا يَوْجَـبْـشِي عْـلَى مُـولاَهْ بَـاصْ أَبُـورْ

يَجْـرِي فِي وَسْـطْ الْمَاء كِي بْـغَى يَتْـخَرَّرْ

*

يَـضْرُبْ وَ يْـوَلِّي وَ يْـدِيـرْ دَمِّـي تُـورْ

يَضْـرُبْ ضْرِيبْ الْغَـرْمُولْ تَحْـتْ الْمَنْـحَرْ

*

ضَـرْبَـة وَاحْـدَة يَهْـدَى كُلْ شِي مَكْـسُورْ

جَـرْيَهْ كِي جَـرْيْ الْمَهْـرِي مْـنِينْ يْغَـوَّرْ

*

مَا تَـحَّـكْمَـهْ مَـشِيـنَة الِّي فَـى الْـبُـورْ

 

 

مَـا يَـهْـدَى جُـرَّة وَ لاَ طْـرِيـڤْ امَّـوَّرْ

*

مَــا عَــنْـدُه جَــرَّارَة وَ لاَ رَسُّــورْ

مَـا يَـطْلَـڤْ دُخَّـانْ وَ لاَ عْـجَاجْ يْـتَيَّـرْ

*

بَالْمَـاء الْڤَاطَـعْ وُ لِيصَانْـصْ وَ الْكَـرْبُـورْ

وَصْفَـهْ كِي وَصْفْ الدَّنْـفِيلْ فَى الْمَاء يَجْـهَرْ

*

مَـا تَـدُّخْـلَـهْ ڤُـطْـرَة وَ لاَ شَــالُـورْ

مَـا يَـقْـدَرْ صَـوَّارْ لْصِـيفْـتَهْ يْصَوَّرْ

*

كَـاسْ مْـبَـلَّـعْ مَـثْـلَـهْ كِي الْكَـنْكَـفُورْ

زُوجْ سْـلاَطِينْ تْـلاَڤُـوا عْـلَى لَعْـبْ زْهَرْ

*

الْـغَـالَـبْ يْـڤُـولْ لْـصَـاحْـبُـه دَئُـورْ

الرُّسِـي وَ ڤْـلِيـزِي جَـا مْـعَ ذُو يَـنْعَـرْ

*

أَهْـلْ مْـزِيَـة وَ اهْلْ جْـمِيلْ وَ الْفَـابُـورْ

لاَرُومَـانِي وَ الْبَـالْجِيـكْ لِـهُـمْ حَـاضَـرْ

*

الْيُـومْ الِّي سَـنْيُـوا سَنْـيُوا عْـلَى الْأُمُـورْ

الرُّوسِـي وَ ڤْـلِيزِي جَا مْـعَ جَـيْشْ ءَاخُـرْ

*

ذُو هُـمَا كَـامَـلْ وَ فْـرَانْـصَة دَاكُـورْ

هَـذُوا كَـانُوا بَـكْـرِي عَـزّْ لَلِّـي بَـايَـرْ

*

كَـمَّنْ زَيْـشْ هْـدَاوَهْ يَا بْـنِـي مَـقْـهُورْ

أَهْـلْ الْعَـدَّة وَ اهْـلْ سْـلاَحْ زِيـنْ مْعَـزَّرْ

*

بِهُـمْ يَنْـطَحْ جُـوفْـرْ التَّـايَـكْ الْمَـذْكُورْ

يَـوْجَـبْ لِي بَـوْلاَدْ فْـرَانْصَـة نَسْـتَفْـخَرْ

*

نَـحْنُ طَـاعَـة وَ رْعَـيَّـة مْعَ الْجَـمْهُـورْ

وَعْــدْ الله عْـلَـى الاَسْـلاَمْ رَادْ وُ قَــدَّرْ

*

تُـغْدَى هَـذَا الشَّـدَّة وَ الْفَـلْـكْ رَاهْ يْـدُورْ

بَكَّتْنِي عَارَمْ حُرَّة امْرَة مَحْجُورْ

تَمَّتْ