Les Ouvrages Du CRASC

Centre de Recherche en Anthropologie Sociale et Culturelle

Index des ouvrages

للسيد مصطفى بن ابراهيم لما بلغه خبر وفات احد احبته :

 

هَدَّة

مَـشْيَنْ خَـبْرْ دْرَكْـنِي الْيُـومْ زَادْ الْعْـذَابْ

*

هَـوَّلْ ڤَـلْبِي مَنْـحُوسْ خِـيرْ مَـا فِـيـهْ

كْـوَانِي كَـيّْ خْـلاَفْ فِي دْلِـيلِي وُ طَـابْ

*

ڤَـلْبِي مَصْـهُودْ صْـهِيـدْ وَاشْ يَـبْرِيـهْ

ڤَـالُوا لِي بَنْ قَـادِي مْـشَى لَّلحْـدْ التَّـرَابْ

*

عُـمْـرَكْ مَـا بَـاقِـي لَكْ مَـا تْـوَافِـيهْ

مَعْـظَمْ هَـذَا الْغَمْـرَة تْشَـيَّبْ الِّي شْبَـابْ

*

وَ الِّي يْحَـبُّه كِـيـفِي فْـنَـى تْـرَشِّـيـهْ

فْرَاشْ

مَـشْيَـنْ خَـبْرْ ادْرَكْـنِي * وُ كَـثَّرْ مْحَايْنِي

*

ضُـرَّهْ طَحْنْ طْحَـنِّي * وُ رَاه زَادْ الْحْـزَانْ

حِـينْ سْمَعْتُ هَلَّـكْنِي * وُ حَـرَّكْ سْفَـايْـنِي

*

فِـي ڤَـلْبِي زَيْـلَفْـنِي * ڤْْـدَاتْ نِـيـرَانْ

مَحَّـنْـتِي بَالْمَـثْـنِي * بْغِـيتَـكْ تْـسَـالْنِي

*

يَـا سَـايَلْ تَعْـذَرْنِي * تْـذُوقْ الاَمْـحَـانْ

احْـبَابِي غَـدْرُونِـي * الْمُـوتْ عَـرَّاتْـنِي

*

لاَ مَـنْ جَا عَـزَّانِي * فِي مُـوتْ الاَخْـوَانْ

رَانِـي رَانِـي رَانِـي * انُّــوحْ بَاغْـبَـانِي

*

عْـلَى الِّي فَـرْڤُـونِي * وْجُـوهْ الاَحْـسَانْ

الْعَـارَمْ وَ الْبَـرْنِـي * فْـنَـاوْ فَـنَّـاوْنِـي

*

هَـذَا حَـدّْ زْمَـانِي * السَّـعْـدْ مَـا كَـانْ

هَدَّة

هَـذَا حَـدّْ زْمَـانِي بْـقِيتْ بَـاقِي عْـڤَابْ

*

سَـلْـفْ الْجُـودْ مْـشَى مْـعَ مّْـوَالِـيـهْ

       

 

الْجْـمِيلْ الْغَـانِي بْـلاَ حِيـلَة وِيـنْ غَـابْ

*

حْـيَـا وَ سْـخَا وَ النُّـورْ سَـرّْ كَـاسِيـهْ

خَـيِّرْ خِيرْ مْنَ النَّـاسْ فَايَـقْ عْلَى الْعْـرَابْ

*

غُـصْنْ مْـأَصَّلْ السَّـعْدْ غَـرّْنِـي فِـيـهْ

ءَاهْ عْـلَى بُوجَمْـعَة نْسَـاهْ شِيـخُه وُ غَـابْ

*

ابْـرَاهِيـمْ الشَّـرْڤِـي الْـغَـرْبْ كَـالِـيهْ

فْرَاشْ

يَـفْهَـمْ فِي قَـوْلِي * رْقِـيـبْ لَـفْعَـايْلِي

*

الاَوَّلْ مْـعَ التَّـالِي * الْقِـيـلْ وَ الْـقَـالْ

يَخْـبَرْ بَاحْـوَالِي * الْـكُـلْ وَ مْسَـايْـلِي

*

يَـخْبَـرْ بَـدْلِيـلِي * فْـتُـوحْ وَ قْـفَـالْ

يَا وِيـلِي يَا وِيـلِي * السَّعْـدْ كِي خَـابْ لِـي

*

فَى الْخَـلَّة وَ خْـلِيلِي * اسْـوَادْ وَ كْـحَـالْ

ذَرْوَكْ مَا بَاقِـي لِـي * احْـبَابْ يَـهْوَاوْ لِـي

*

غِـيرْ إِذَا جَادْ الْعَـالِي * بَّـعْضْ الاَفْـضَالْ

نْخَـمَّمْ فِي حَـالِي * الظَّـنْ كِي خَـابْ لِي

*

بَـاخَسْ وَ لَّى غَـالِي * عْـيِيـتْ نَـحْـتَالْ

وَ نْـمِيَّزْ فَى احْـوَالِي * وْلِيـفْ مَا طَـابْ لِي

*

وَاحَـدْ مَا يَحْـلَى لِي * يْـجِي عْلَى الْبَـالْ

هَدَّة

وَاحَـدْ مَا يَحْـلَى لِي يْـجِي حْـدِيثُه صْوَابْ

*

بَـعْدْ انْ يَحْـلَـفْ الاَيْـمَـانْ مَا نْـثَڤِّـيهْ

لَكِـنْ وَعْـدْ الله هَـاكْ لِــيَ كْـتَـابْ

*

وَاشْ بْـقَـى لِي مَـنْ غِـيرْ ذُو نْـرَبِّـيهْ

لُو نَـهْدَرْ بَاسْـرَارِي تْشُوفْ عَجْـبْ الْعْجَابْ

*

نَـسْمَعْ غُـرْبَةْ الْغَـرْبْ شَـفْـتْ مَا فِـيهْ

ازَّلْـوَجْتْ بْـلاَدَاتْ فَى الْجْـبَالْ الصّْـعَـابْ

*

شَــدَّة وَ رْخَــة الله تَـاكَـلْ عْـلِـيـهْ

فْرَاشْ

بْفَـضْلْ مُولاَيْ ادْرِيـسْ * دُرّْ وَجْـهِي نْفِيسْ

*

وَ جْـلَبْتْ عْقُولْ تْغِيسْ * مَا دْرَاتْ الْكْـدَاسْ

جَـدْوَلْ لِيَ تَـخْمِيـسْ * حَـاطُّه بَالنْـكِيـسْ

*

شِـيخِي مُولَى تَفْـلِيسْ * طَايْـعُه كُلْ فَـاسْ

نَمْشِي مَشْيْ التَّنْكِيسْ * ِليسْ مَانِي حْرِيصْ

*

وَ عْفَسْتْ النَّاسْ عْفِيسْ * خَضْعَتْ لِيَ لْصَاصْ

فَى الْبَـرْبَرْ لِي تَـأْنِيسْ * جَـايَلْ بْلاَ وْنِـيسْ

*

نَظْرِي تَحْتْ التَّدْمِيسْ * غَضّْ بَحْرْ النَّعَاسْ

بَـرْيَاصَة وَ تْـهَنْدِيسْ * نَڤْـبَضْ الطِّيرْ قِـيسْ

*

لُو يَتْـعَلَّى تَفْـرِيسْ * لاَ بُـدّْ مْنَ الْمْـرَاسْ

كَمْ عَلَّـقْتْ نْوَاقِيسْ * فِي عْـقُولْ الْخْصِيصْ

*

نَـعْرَفْ الِّي جَسِيسْ * فِي حْدِيـثُه جْسَـاسْ

هَدَّة

يَا صَبْـرِي مْخَـوَّلْ الدّْعُوجْ كَحْـلْ الْهْـدَابْ

*

بَـعْدْ انْ نَـحْزَنْ عَـامِيـنْ مَـا نْـكَافِـيهْ

سَهْـسَهْ عَظْـمِي رْشَى فْنِـيتْ وَ الْمُـخْ ذَابْ

*

مِيـرْ حْـجَـايَ ذَا الْغُـنْـجْ رَاهْ كَـاوِيـهْ

الِّي قَـوَّى الاَمْـحَـانْ زَادْهَـا وَ الْـكْـرَابْ

*

بَنْ قَـادِي بَحْـرْ الْجُـودْ وَ السّْـخَة لِـيـهْ

يَا حَـزْنِي يَا حَـزْنِي عْـلِيـهْ سِيدْ الرّْقَـابْ

*

مَا بَـاقِي لِـي مَـحْـبُـوبْ غِـيرَهْ نْجِـيهْ

فْرَاشْ

مَـا بَـاقي لِي مَلْـقَة * الاَّ نْـزِيـدْ الشَّـقَـة

*

حِـينْ مْشَـاتْ الرَّفْقَة * عْڤَـبْتْ لَدْيَـارْهَا

مَانِـي مَنْ اَهْلْ الدَّلْـقَة * تْـجَوَّقْ جْـوَاقَـة

*

بَـحْرَفْهَـا تَتْـرَقَّـى * ذْلاَلْ لَـسْيَـادْهَـا

 

مَـانِي مْنَ الْحُمَـاقَة * امْخَـاخْـهُمْ خَـارْقَـة

*

مَـلْقَاهُـمْ مْـشَقَّـة * النَّـاسْ بَطْـبَاعْـهَـا

لِي صَـنْعَـة دَقِيـقَة * مْنَ الْعْـقَـلْ رَاقَّـة

*

بَضْـرَافَة وَ حْدَاقَـة * الله لِـي هَـابْـهَا

مَاهْـلْ الْجُودْ ءَاشْ بْـقَى * مْـشَاوْ بَرْفَـاقَـة

*

مَخْبَـرْهُمْ نَسْتَسْقَى * وُ نَسْتَـنْشَقْ ارْيَاحْـهَا

شْـيُوخْ الزَّنْـدَقَـة * اذْكَـارْهُـمْ سَـارْقَـة

*

مَا فِـيهُـمْ شِـي التُّـقَى * تْبـِيعْ لَـوْرَادْهَا

هَدَّة

نَـتْلاَوَحْ فِي قَـوْلِي الاَّ امْـحَالُـه سْـرَابْ

*

فِـي كُـلْ بْحَـرْ تَمْـشِي سْفَـايْـنِي فِـيهْ

وَ نْـخَمَّمْ فَى الْأُمُـورْ نَفْـتْـكَرْ كُـلْ بَـابْ

*

وَ قْـلُوبْ النَّـاسْ شْـعَابْ كُـونَكْ نْـبِيـهْ

نََـظْمِي سَلْعُـه مَخْـلُوطْ مَن يْـرِيدْ السّْبَـابْ

*

مَنْ تَعْشَـقْـشِي عَيْـنُـه قْـمَـاشْ يَشْـرِيهْ

تَـلْعَـبْ بِيَ الاَرْيَـاحْ مَنْ فْـرَاڤْ الْحْـبَابْ

 

هْـمُـومْ الْوَقْـتْ وُ جِـيلْـنَـا السَّـفِيـهْ

تَمَّتْ